談孖展

引用自Terence's sketchbook - 一個蛋散戶的Blog
http://terence-sketchbook.blogspot.com/2007/10/blog-post_07.html

今日呢篇野,我相信各位會終身受用,我講股票可以唔睇,但呢篇野各位就一定用得著.呢篇野唔係理論,各位唔需要抄捉,但係睇完之後絕對可以stimulate各位去發掘屬於自己既一套-"Financial Intelligence".如果各位喜歡此文,歡迎各位將呢篇文章轉去俾你地既親朋戚友.

所謂財技,唔好俾佢個名嚇親,我對財技既定義,好簡單,係財務上既生活智慧,我地每日都應付scarcity既煩腦,如做選擇,例如買Nike定係買Reebok,食大家樂定係食大快活,入滙豐定買中移動,每天做緊同錢有關既野,錢係我地既工具,只要多加留意一d細節,改善一d惡習,我地都可以develop屬於自己既一套財技.不過,首先我要講講抽新股既事.

*****

(1) IPO

據我所知,HSBC,HANGSENG同BOCHK(呢間就肯定係,因為我有用)係用nominee a/c去幫客仔抽新股,而我用開果間經紀行都係用nominee a/c去做.咁即係佢地係用客戶代理人既名義去抽新股,唔會直接用客戶既ID去抽. 而我地每人都可以自行用白表或黃表抽新股.

咁即係話,一個人係可以同時thru HSBC,Hangseng,BOCHK,經紀行以佢地代理我地去抽IPO(唔會主動disclose ID,因為係佢地代表你抽),另外再用黃或白表真接用自己名義抽新股.咁理論上係可以有5注,但頭四注每注利錢1舊水,no guarantee,抵唔抵就貴客自理.

係咪check唔到呢?唔係,有心check就一定可以check,好簡單,只要問d nominee攞ID咪check到(nominee唔主動disclose,但by the operation of laws佢地就要架啦~)但係... 正苦會check?木宰羊.

上次正苦查(好似係洛鉬??),果條友,好似係同時用黃表加白表,用唔同ID(假ID)去抽... 喂,咁就唔同呀,佢係misrep喎,有法律責任... 違法既野,我地就絕對唔應該做.

記住,我呢篇文章,只係叫正苦快d堵塞呢個漏洞,等d淨係識白表或黃表抽新股既人,獲得公平既機會!

*****

(2) 善用槓桿(i)

作為一個做commercial lending出身既小伙子,我當初唔明,點解d公司咁有錢,都仲要問銀行借錢呢?原因好簡單,因為D錢係平錢.只要好好咁平衡cost of debt及cost of equity,就會做到一個好理想既效果.

我一畢業,就有負債$7x,xxx(grant loan),但係我(大家都應該試過)收到d往來銀行(通常都係有credit card果d)既offer,有一d instalment loan或OD俾我...獅子銀行就曾經offer monthly flat rate 0.55%,俾$63,000, 我話要48個月還款,金額要12萬,再平d息,當然,我要提交入息證明...最後,我將credit card limit由$4萬幾減到$2萬,攞到$90,000,monthly flat rate係0.48%(唔還拖佢就唔減,banker係咁賤架),annualized既rate我冇記錯係低過10%(呢個先至係你考慮既因素),我諗如果cut埋痕身張卡應該會攞到更多(因為痕身係獅子member),但係痕身張卡畢竟寫左我間大學名,cut左都唔知仲有冇,算啦.

呢個世界係好唔公平既,我可以話你聽,我增加左呢條負債之後,收到既offer係有更低既利息(before global credit crunch),你會奇怪,我債務深重左,銀行仲肯借錢,而且係offer一個更平既利息俾我?係,呢個世界就係咁,我有借貸記錄(有個叫TU既野record哂),佢地既uncertainty細左,而且我信用卡使用率活躍(而家連Octopus都係俾credit card,我去百佳買排Airwave都係用credit card...呢個世代,有9成消費都可以免息拖數一個月),完全冇hardcore(即係只還最低還款金額,而且情況持續,咁就叫hardcore),更加冇default(逾期唔還),而且我有tendancy肯借錢,咁佢地易sell d,好過solicite其他生客.

我唔係鼓勵借錢消費,但係,如果我借左呢筆錢,我就更易滾大,當然你要有信心去滾大佢(如果我冇信心,我唔會開呢個blog).

好似抽恒鼎,散戶去抽,你睇下中籤率?我多左本錢,然後再借孖展(下part再談),我係啃硬你,散戶幾經辛苦先中一手,就算最高位放,都係賺4千幾蚊(其實如果按統計學既expected value計,邊有丫),我就一野中4000股(今次guanrantee既係3500股,by luck再中500股),扣埋孖展成本,我一日執左>$15,000... 呢$15,000,又增加左我下次抽股(SOHO)既本錢,又可以做大D孖展,抽更加多(我今次抽SOHO,900,000股中17500股,如果按$10.48暗盤收市價,減利息支出後我執佢>$26,000)...而且我係屬於大額認購(一陣講),我連IPO孖展息都重可以平幾十點子(100點子=1%),你話死未?呢個世界真係好狗,但係我地只要留意下,就可以加以應用.

有好多人好抗拒借錢,抗拒做槓桿...佢地唔肯做十日八槓桿,但係肯做20年既槓桿(一陣再談,呢一樣野,我讀緊大學時已經有講過,部份朋友應該有印象)...我真係唔明.

*****

(3) 善用槓桿(ii)-孖展抽新股

呢樣唔講咁多,用我SOHO一例說明.

我抽900,000股,每股$8.3,要$7,470,000.

我借9成,自己出一成,即係自己出錢$747,000,再借錢$6,723,000.

我果間經紀行俾我既息係6.94% per annum (好叉高... 不過拆息高企, 無計),但係只係要俾8日(以前有d IPO要成10幾日息,視乎橫跨左幾多個星期六日),咁我要俾既利息係$6,723,000 x 6.94% x 8/365 (一年有365日) = circa $10226. (如果借少過$5,000,000, 據我所知利率要 >7.2% p.a.,但我佢當我大客又平d息...有d更加大額(出幾百萬借幾千萬果d),利率係更加平,係咪好冇天理?)

結果係攞到17,500股, 我每股成本係 (17,500 x 8.3 (招股價) + 10226 +)/17500 = $8.883,加埋d手續費呀呢樣果樣,平均每股成本約$8.95.退票後,剩低果d錢就入返我個戶口,平埋條孖展數,咁成個過程就完,你再無爭人任何錢.

隻股升8%,我就打和.

我個risk係,佢如果一人一手, 就會通街街貨;如果超額唔多(今次好似得160倍到,一d都唔多啦),咁第一日個上升空間會有所限制,我攞得多貨都無用...最怕係上市果日大圍市況氣氛麻麻,我就捉蟲... 不過,呢d risks,你買賣股票都要預左...我可以話,呢風險基本上唔係來自抽孖展,純椊係你投資投機就要面對.

(4) 同場加映-抽股的藝術

如果唔係孖展抽,我建議係抽一手搏一手...你抽幾手係冇意義既,隨時係仲衰,因為響大部份情況,抽幾手中一手既機會係同抽一手中一手既機會差不多,呢樣野係咪嚇親你?因為佢盡量想做到越多人中越好,皆大歡喜嘛,請願俾抽一手同抽兩手既人每人一手,好過俾哂兩手同一個人,係統計學既問題:

抽一手既人: 100個人 (共抽100手)
抽兩手既人: 50個人 (共抽100手)

如果兩邊既中奬率都係20%, 即係有20+10=30個人中,前20人一人一手,後面果10個有兩手,呢度係40手.總體中籤率都係20%(=40/200).

同樣20%既總體中籤率,如果抽一手果邊係30%,抽兩手果邊係10%,有30個抽一手既人中一手,有5個抽兩手既人中兩手,咁都係得40手,但係有35個人中,係多左人中,而抽一手果邊既中籤機會係大過抽兩手果邊.

上面只係一個example!你會見到好多case抽兩手,抽三手,抽四手,都係中一手,其實條式係會複雜d,但係個精神係無變既:就係同一樣既整體中籤率,盡量做到越多人中越好,唔係遍埋一二邊,只要係咁,抽幾手中籤既機會其實唔會同抽一手中籤既機會爭好遠,而越多人係好細額咁抽,咁入大飛抽既人係會越俾人撻薄既(試諗下,撻薄李四叔一個人(假設佢都係入飛去抽啦)一兩個%,可能有成千上萬個人中奬,可樂而不為?)!所以仲點解要抽多過一手呢?又少d機會(或者最多係同抽一手既機會一樣),但又俾佢鎖死左多d錢,點解要咁傻?一係就大額入飛,取得一個guanrantee既百份比(好似SOHO,大額入飛既係劃一獲配1.94%,我為例,就係900,000 x 1.94% = 17,500股)

*****

(5) 好多人都做緊既槓桿?

識我既人都知我想講乜架啦...就算你俾三成首期,你都要借七成,仲隨時係還廿年... 按揭買樓,絕對係一個高利率(要成4-5%p.a.,仲有上調空間),而且做成十幾廿年既孖展黎!我孖展抽新股都係十日八日,借instalment loan都係4年期,就算我再apply一條O/D備用額度,我都唔會用足一年(用足一年就係hardcore啦)...但係做mortgage,你一係就賣樓還錢,一係突然中六合彩或者3T即刻可以贖樓,如果唔係,就要生吞呢個廿年既孖展交易.

另一個大issue,係果三成首期(加埋其他林沈野,如律師費,stamp duty等),你可以好好咁運用黎錢搵錢,亦即係我一直寫響呢個blog既野.

咁係咪唔買樓呢?唔係.他朝一日,我都會置業,到時我會用現金一次付清,然後做7成問銀行攞一條P rate(甚至係Hibor + 既rate)既over draft facility.好好運用呢條line錢搵錢.

Mortgage息雖然係隨本減,但說穿了只係幫銀行打工...我自己做過commercial lending,而且都叫做見識過下d大戶及i-bank係點做property investment,而且你都見新地,長實,信和佢地搵幾多錢,就知向佢地買樓(即係做佢地下家)係幾咁唔化算...我就好少聽見收租既人會某取暴利(先出租後賣果d就唔計啦,暴利果一段係賣樓得黎)...我地(包括我自己)唔係大戶,但要有大戶既vision,如果唔係俾多一世打工都唔掂.

*****

(6) 後記
其實,本來想逐d逐d寫,但係諗落,如果可以一次果俾各位睇,效果可能更好...建立自己果一套唔係一朝一夕既事,越早開始越早輸過就可以越早知點樣先做得更好.

財務智慧更加可以從日常生活中滲出黎...我地存薄仔,中銀為例,好似得2.3%,仲要每半年先俾一次息...我會點做呢?佢一個week fixed deposit 2.5%, 一個月2.7%, 咁緊係做一個月定期啦...但係要被人鎖一個月,要增加liquidity,我會咁做:將一筆想save既錢,分成4舊,第一個星期用一舊錢做一個月,另外三舊做一星期,第二個星期,再將第二舊錢做一個月,餘下兩舊錢做一星期,so on,咁就會產生4筆唔同時間到期既一個月定期存款,你可以享受一個月既定期息率,又可以每個星期到期一筆錢俾你決定點樣使用(就好似只係做左一個星期定期咁)...當然,我一定唔會咁浪費d錢做deposit,只係舉example.

我出面間經紀行係每月俾一次息,仲有成2.55%p.a.,如果我枕住有約50萬既credit balance,每個月都有成千蚊駛...真係唔好睇少呢d錢,可以做到好多野.